Peja Jazz VI – Ilir Bajri TRIO | Introspective
Ilir Bajri Trio vjen në Peja Jazz
Ilir Bajri Trio vjen në Peja Jazz, në Kinemanë “Jusuf Gërvalla”, për të na rrëmbyer sërish në magjinë e jazz-it.
23 tetor 2025 | 20:00
Kinema “Jusuf Gërvalla” – Pejë
INTROSPECTIVE
Këtu, mendimi merr formën e tingullit. Takohemi në një shkëmbim të qetë mendjesh, të udhëhequr nga talenti dhe të zbutur nga shija, për të eksploruar ato që vështirë mund të thuhen me fjalë. Shkëmbejmë intuita, jo argumente; dëgjojmë po aq sa luajmë. Dialogu lëviz midis dritës dhe hijes, sigurisë dhe dyshimit, duke ndjekur hapësirën e brishtë ku intelekti zbutet në emocion dhe heshtja e plotëson idenë.
Ilir Bajri: piano
Ilir Bajri (1969) është kompozitor dhe pianist i lindur në Pejë. Ai ka përfunduar studimet në Akademinë e Arteve të Universitetit të Prishtinës, në Departamentin e Arteve Muzikore. Kryesisht i njohur për xhaz, ai ka punuar dhe eksperimentuar gjithashtu me zhanre të ndryshme si muzika pop, klasike dhe bashkëkohore, si dhe ka shkruar muzikë për teatër, filma artistikë dhe dokumentarë. Përveç punës së tij si kompozitor, ai është i njohur edhe për krijimtarinë e tij vizuale dhe performancat që prezantojnë punime të reja në fushat eksperimentale dhe multimediatike. Një nga bashkëthemeluesit e Qendrës për Muzikë të Re (2001), ai është gjithashtu themelues dhe drejtues i ansamblit rinor Quasi Fusion Orchestra dhe themelues e organizator i Prishtina Jazz Festival (2005–2014). Vitet e fundit, ai merret edhe me krijimin e instrumenteve muzikore virtuale opensource dhe falas për platforma kompjuterike, si dhe me përgatitjen e programeve dhe materialeve për vetëedukim e zhvillim në muzikë.
Visar Kuçi: kitarë, bas-kitarë
Repertori i tij përfshin zhanre të ndryshme të muzikës, nga ajo klasike, xhaz, bluz, rok e pop, deri te muzika për film dhe teatër, të interpretuara në instrumente të ndryshme si violinë, kitarë, bas, kontrabas, mandolinë etj. Ai gjithashtu kompozon muzikë për Trio-n e tij, për hapësira të ndryshme si muze apo ambiente të tjera artistike, si dhe është arranzhues dhe producent për artistë të ndryshëm. Si multi-instrumentist, ai ka pasur mundësinë të performojë me emra të njohur të skenës ndërkombëtare si Rhani Krija, Christian Kappe, Clay Ross, Philip Dizack, Elina Duni, Eda Zari dhe The New York Gipsy All Stars. Është anëtar aktiv i grupeve: Visar Kuçi Trio, Gipsy Groove, Gesundheit Quartet, DLTYN, Eda Zari, Genc Salihu dhe Nesim Maxhuni Quintet.
Violinist koncertal, koncertmjeshtër i Filharmonisë së Kosovës, si dhe anëtar i rregullt i Mannheimer Philharmoniker në Mannheim, Gjermani.
Enes Beu: bateri
Enes Bajramliqi është multiinstrumentist, këngëtar dhe kompozitor nga Prishtina. I njohur për personalitetin e tij dinamik muzikor dhe ndjeshmërinë e tij të qetë, ai ndërthur xhazin me elemente të tjera bashkëkohore. Fillimet e tij lidhen me xhazin dhe fusion-in, ndërsa në fund të viteve ’90 ishte pjesë e skenës alternative rock në Prishtinë. Në vitin 2004 bashkëthemeloi projektin Cute Babulja, duke publikuar një album që solli disa hite mbarëkombëtare. Më pas u përqendrua në xhaz, duke bashkëpunuar me emra si Armend Xhaferi dhe Ilir Bajri. Ka qenë anëtar i Trio of Love dhe Jazzometer, si dhe ka bashkëpunuar me Elina Duni në albumin Muza e zezë. Projekti i tij i fundit, EnesBeu Quartet, me albumin Between Wind and Waves, shënon një udhëtim personal mes tingullit, intuitës dhe përvojës.
