Beirut Animation Nights: Anibar qëndron pranë Libanit

Në kohë krize dhe lufte, besojmë se arti dhe kultura mund të jenë mjete të fuqishme për të ndërtuar rezistencë, solidaritet dhe dinjitet.
Anibar qëndron pranë popullit të Libanit, i cili vazhdon të përballet me sulme shkatërruese ushtarake, humbje jetësh dhe rrënimin e shtëpive e komuniteteve të tëra. Zërat e tyre duhet të dëgjohen.

Beirut Animation Nights vazhdon misionin e tij për ta sjellë animacionin libanez para audiencave ndërkombëtare. Në kuadër të kësaj nisme, Anibar prezanton një përzgjedhje udhëtuese të filmave të shkurtër të animuar nga Libani dhe vende të tjera të botës, të kuruar nga edicionet e tanishme dhe të kaluara të festivalit.

Programi përfshin 23 filma me stile, teknika dhe forma të ndryshme rrëfimi, të ndarë në dy programe: Programin kryesor, për audiencë të rritur dhe të përzier, si dhe programin për fëmijë, i cili u dedikohet fëmijëve dhe familjeve. Të gjitha të hyrat dhe donacionet nga shfaqjet do të shkojnë drejtpërdrejt për ndihmë humanitare, duke mbështetur iniciativa komunitare dhe ndihma esenciale për njerëzit e prekur nga kriza.

Filmat e përzgjedhur sjellin rrëfime për jetë, shtëpi, ëndrra dhe vizione që shndërrohen në rrënoja brenda një nate. Kanou 4 nga Ashtar Alahmad ndjek historinë e një studenteje 23-vjeçare siriane të arteve të bukura, e cila lufton për jetën pasi një raketë godet shtëpinë e saj në Damask, vetëm katër ditë para diplomimit. Ndërsa Another Winter in March nga Natalia Mirzoyan rrëfen historinë e një çifti që detyrohet të largohet nga shtëpia, por arratisja shndërrohet në një makth surreal.

Përballë pasigurisë së përditshme, shumë autorë zgjedhin botë distopike për të reflektuar mbi realitetin. Catocalypse nga Noah Samaha ndjek një burrë që kërkon macen e tij të humbur në një univers paralel ku macet kanë zëvendësuar njerëzit. Në The Synthetic Age, qentë përpiqen t’u shpëtojnë njerëzve, ndërsa Tato 4 imagjinon modele të inteligjencës artificiale të ndërtuara mbi dashurinë dhe kujdesin. Të frymëzuara nga figurat e gjysheve, ato përdorin rrëfime, përkujdesje dhe ninulla për të shëruar shoqërinë, duke synuar t’i japin fund konflikteve, urisë dhe varfërisë.

Reflektimi mbi padrejtësinë shfaqet edhe në The Weight of It All, ku artistja Melinda Mouzannar rikthen figurën folklorike arabe të Abou Kees, personazhin me të cilin frikësohen fëmijët që nuk binden. Filmi pyet nëse ky përbindësh jeton brenda secilit prej nesh dhe nëse ai përfaqëson zemërimin e shtypur që krijojnë rrethanat në të cilat jetojmë.

Të drejtat e grave dhe dhuna me bazë gjinore janë tema të rëndësishme në disa prej filmave të autores. Gardening nga Sarah Beeby trajton procesin e shërimit pas dhunës seksuale, përmes historisë së një gruaje që tërhiqet në “kopshtin” e mendjes së saj për të rigjetur zërin dhe veten. Through Her Eyes nga Cynthia Abboud dhe Joyce Abdelnour ndjek një grua 23-vjeçare që izolohet në mes të oqeanit për shkak të traumave të së kaluarës, ndërsa A Bloody Situation nga Nerian Keywan sjell një rrëfim surreal mbi pubertetin, menstruacionet dhe rritjen në një realitet të trazuar politikisht.

Programi mbyllet me Freeride in C nga Edmunds Jansons, një film meditativ ku qetësia e maleve ndërpritet nga sportistë shumëngjyrësh të sporteve dimërore që zbresin me shpejtësi përgjatë shpateve.

Programi për Fëmijë

Programi për Fëmijë bashkon filma që trajtojnë tema të ndryshme përmes një gjuhe të kuptueshme dhe imagjinative për audiencat e reja. Përmes alegorisë, absurdit dhe botëve fantastike, këto histori i ftojnë fëmijët të kuptojnë dallimet, të shohin përtej dukjes dhe të përballen me frikërat e tyre.

Filma si Stardust nga Christie Khalil eksplorojnë idenë se të gjithë jemi pjesë e të njëjtit univers dhe të lidhur përmes dashurisë, ndërsa Le Voleur de Casseroles nga Nicolas Fattouh zhvillohet në planetin Ednomalie, ku njerëzit lindin me tenxhere të bardha të lidhura pas trupit dhe duhet t’i lustrojnë vazhdimisht për të mbijetuar.

Frikërat e fëmijërisë dhe figura folklorike e Abou Kees rikthehen në disa filma. Abou Kees aw Yemeken Em Kees nga Hadi Chebli tregon historinë e një djali pesëvjeçar që zbulon se përbindëshi për të cilin e paralajmëronte e ëma nuk është aspak siç e kishte imagjinuar. Abu Kees wel Batata vendos legjendën në një treg plot gjallëri në Bejrut, ndërsa Abu Kees Bala Kees imagjinon vetë Abou Kees-in duke mbetur pa thesat me të cilët zakonisht “mbledh” fëmijët e pabindur. Golden French Fries nga Shima Markazi Omidvar sjell historinë e një fëmije të fiksuar pas patateve të skuqura.

Transformimi dhe ndryshimi janë në qendër të filmave si Kiki and Bouba – A Peachy Story, ku dy fermerë debatojnë për mënyrën ideale të kultivimit të pjeshkëve, dhe With Each Passing Day, që ndjek një miushë të moshuar e cila kërkon të rigjejë lumturinë në kujtimet e saj.

Rritja dhe pranimi i dallimeve trajtohen në In His Bubble, historia e një djali shtatëvjeçar me autizëm, ku nëna e tij kupton se nuk duhet ta nxjerrë atë nga bota e tij, por të hyjë vetë në të. How My Grandmother Became A Chair rrëfen transformimin e një gjysheje që humbet një nga një pesë shqisat derisa shndërrohet në një karrige prej druri, ndërsa Escape Recipe ndjek një vajzë të re që lufton mes ëndrrave të saj dhe pritshmërive të familjes.

Rregullat, autoriteti dhe kontrolli shoqëror trajtohen përmes këndvështrimit të fëmijëve në Kees’s Camp, ku fëmijët “e pabindur” dërgohen në një kamp disipline, si dhe në Backjump, një aventurë energjike cyberpunk ku dy artistë rebelë të rrugës përpiqen të shpëtojnë mikun e tyre në një shtet autoritar.