TOEI ANIMATIONS: Të gjitha karamelet magjike në një bisedë

Daisuke Nishio dhe Takashi Washio nga Toei Productions.

Çdo vit në Anibar, kemi mysafirë të mrekullueshëm që sjellin përvojat e tyre nga e gjithë bota në Pejë për publikun e etur për kuriozitet, për të cilin tashmë jemi të njohur. Dhe të ftuarit e këtij edicioni janë vërtet yje: Daisuke Nishio dhe Takashi Washio nga Toei Productions. Puna e tyre në botën e anime është, siç e dimë, e pakrahasueshme, me kontribut në produksione si Dragon Ball, Sailor Moon dhe One Piece.

Para se të fillonte sesioni, bisedat në kinema reflektonin nostalgjinë që dikush ndjen kur dëgjon melodinë hyrëse të serialit tënd të animuar të preferuar. Të gjithë ishin mbledhur me padurim për këtë bisedë, por më parë pamë “Magic Candies”, një film i Nishios dhe Washios, që ndjek rrëfimin e një fëmije që nis eksplorimin e botës dhe imagjinatës kur përpara tij shfaqet një qese me karamele magjike si një metaforë për kuriozitetin e pandalshëm të fëmijëve dhe procese që ndonjëherë nuk i kuptojmë mirë, por që na definojnë mënyrën si e shohim botën.

Ashtu si në çdo film apo projekt të ngrohtë dhe qetësues të animuar, eksplorohet fuqia e butë e rrëfimit të një historie, thjesht për kënaqësinë e tregimit. Teksa fëmija ha një karamele magjike, objektet dhe kafshët fillojnë të flasin, duke ofruar një perspektivë të re përmes humorit, këshillave të mençura dhe qasjeve kurioze.

Pas shfaqjes, më në fund patëm mundësinë të takonim dy animatorët e nderuar që kanë bashkëpunuar për vite me radhë dhe që, siç thanë vetë, gjejnë kënaqësi duke punuar me njerëz që ndjejnë dhe kuptojnë vizionin në të njëjtin ritëm. Përvoja e tyre në animacion është padyshim e lidhur me bashkëpunimin me shkrimtarë dhe krijues të tjerë, dhe për ta kjo marrëdhënie është thelbësore për të përcjellë historinë me të njëjtin puls dhe emocion.

Gjatë bisedës së tyre, ata shpjeguan procesin e punës, si dhe magjepsjen e tyre me ndërtimin e botëve dhe zhvillimin e personazheve, duke gjetur kënaqësi edhe në konceptin e kalimit të kohës qoftë një re që zhduket apo një fletë që fërfëllon në erë. 

Gjetja e kënaqësisë në lëvizjet minimale për ta është po aq e rëndësishme sa krijimi i një personazhi nga e para.

A kanë ndonjë personazh të preferuar? Nuk na e treguan, por e lanë audiencën të gjejë mënyrën për të vlerësuar momentet, delikatesën e animacionit dhe frymëzimin që mund të vijë edhe nga çastet më të rastësishme.

Duke folur për ndikimin e tyre në nivel global, ata shprehën mirënjohje dhe vlerësim që publiku kosovar i ka gjetur të këndshme krijimet në të cilat ata kanë punuar, duke e ditur rëndësinë e gjetjes së qetësisë edhe në kohë të vështira.

Ishte kënaqësi e madhe të bisedonim me Nishio dhe Washio, ndërsa ftesa mbetet e hapur për t’u rikthyer tek puna e tyre dhe për të vlerësuar fuqinë e animacionit.

Fotoja në ballinë: Anibar / Elmedina Arapi