Nga festivalet e animacionit në Hollywood: Prezantimi frymëzues i Mike Hollingsworth
![](https://anibar.org/wp-content/uploads/2024/07/©-Tughan-Anit-2-scaled.jpg)
Mike Hollingsworth mbajti një prezantim të veçantë të titulluar "Nga festivalet e animacionit në Hollywood DHE PASTAJ KTHIMI NË FESTIVALE!".
Në Kinemanë “Jusuf Gërvalla”, të shtunën, animatori i njohur Mike Hollingsworth mbajti një prezantim të veçantë të titulluar “Nga festivalet e animacionit në Hollywood DHE PASTAJ KTHIMI NË FESTIVALE!”. Prezantimi i Hollingsworth-it përshkroi rrugëtimin e tij humoristik nga krijimi i filmave të shkurtër të animuar për festivale si Anibar, deri te suksesi i madh në krijimin e serisë së parë të animuar të Netflix-it, BoJack Horseman.
Mike Hollingsworth ndau me audiencën përvojat dhe sfidat e tij gjatë rrugëtimit të tij profesional. Ai tregoi se si aftësitë e fituara nga krijimi i filmave të pavarur të shkurtër e ndihmuan të ngjitej shpejt në industrinë e animacionit. Hollingsworth ishte animatori i parë i punësuar nga Netflix kur drejtoi episodin pilot për BoJack Horseman në vitin 2013. Ai mbikëqyri prodhimin e të gjitha gjashtë sezoneve si Drejtor Mbikëqyrës dhe më vonë si Bashkë-Prodhuese Ekzekutiv.
Seria BoJack Horseman arriti një sukses të jashtëzakonshëm kritik. Ajo u rendit si seria më e mirë origjinale e Netflix-it të të gjitha kohërave nga Thrillist dhe Uproxx, ndërsa IndieWire e cilësoi si serinë më të mirë të animuar të të gjitha kohërave. BBC-ja e quajti BoJack Horseman “animacioni më i mirë i shekullit 21”. Megjithatë, Mike pranoi me humor se prindërit e tij ende nuk e kanë parë shfaqjen dhe nuk kanë plane për ta parë, pavarësisht se ai paguan për abonimin e tyre në Netflix!
Prezenca e Mike Hollingsworth në Anibar 2024 ishte një ngjarje inspiruese për të gjithë të pranishmit, duke ofruar një pasqyrë të vlefshme për të gjithë ata që ëndërrojnë të arrijnë sukses në industrinë e animacionit.
Për më shumë informacion:
Email: [email protected]
Phone: +383 44 131 516