Në një rajon ku arsimi formal në animacion është i kufizuar dhe burimet shpesh janë të pakta, çfarë kërkohet për të filluar dhe për të mbajtur një karrierë në animacion? Ky panel shqyrton strategjitë lokale për ndërtimin e një praktike krijuese të qëndrueshme në Ballkan, një praktikë që nuk mbështetet vetëm në partneritete ndërkombëtare ose financim të jashtëm.

Përmes tregimeve personale dhe njohurive praktike, diskutimi eksploron se si animatorët po krijojnë hapësirë për punën e tyre duke përdorur ato që kanë në dispozicion: mësimdhënie komunitare, burime të përbashkëta, inovacion me buxhet të ulët dhe rrjete mbështetjeje informale. Ai shqyrton modelet e qëndrueshmërisë që zhvillohen nga brenda, qoftë përmes studiove kolektive, prodhimit të pavarur apo bashkëpunimit rajonal, si dhe shqyrton si të ruhet motivimi krijues mes kufizimeve financiare dhe strukturore. Në vend që të shohim Ballkanin si një trampolinë drejt një destinacioni tjetër, ky sesion fokusohet në mënyrën se si ta bëjmë atë një bazë afatgjatë për punë kuptimplote dhe të vetëqëndrueshme në animacion.

Moderuese: Vessela Dantcheva

Vessela Dantcheva është regjisore dhe producente animacioni. Ajo ka mbaruar studimet për Animacion në Akademinë e Arteve të Rotterdamit në vitin 2002 dhe ka fituar përvojën e saj në animacion në Holandë. Filmi i saj i parë profesional është "Anna Blume", pastaj ajo ka qenë pjesë e krijimit të filmit "Father", "Travelling Country", koleksionit të poezive "Mark & Verse", "Hierarchy Glitch", "Trace", "Balconada" dhe shumë të tjerë. Në vitin 2008 ajo bashkëthemeloi Compote Collective dhe që atëherë menaxhon prodhimin e filmave të ndryshëm artistikë të animuar, të cilët shfaqen dhe shpërblyer në mbarë botën. Compote Collective është një nga kompanitë kryesore të prodhimit të animacionit në Bullgari me një rekord prej 45 filmash të animuar. Vessela shpesh ftohet të marrë pjesë në punëtori, prezantime dhe si anëtare jurie në festivale ndërkombëtare dhe ngjarje të prezantimit. Ajo është ligjëruese në degën e studimeve të animacionit në Universitetin e Ri Bullgar dhe Akademinë Kombëtare të Arteve në Sofje, Bullgari.

Panelist: Marko Dješka

Marko Dješka është regjisor animacioni, autor komikësh dhe ilustrator kroat me qendër në Zagreb. Ai është regjisor i filmit të shkurtër të animuar të vlerësuar me çmime All Those Sensations in My Belly dhe ka krijuar disa filma dhe komikë të tjerë. I diplomuar në Akademinë e Arteve të Bukura në Zagreb, Marko është gjithashtu kryeredaktor i revistave të komikëve Strip Prefix dhe OHOHOzin, si dhe bashkëorganizator i Festivalit OHOHO. Aktualisht punon si regjisor dhe skenarist në Adriatic Animation.

Panelist: Draško Ivezić

Draško Ivezić ka lindur në vitin 1975 në Pullë, Kroaci. Aktualisht jeton në Angoulême, Francë. Ai punon si regjisor filmash të animuar, skenarist, producent dhe aktor zëri. Është bashkëthemelues i studios Adriatic Animation në Kroaci dhe bashkëpunon me talente nga Kroacia dhe Evropa Lindore e Qendrore.

Ivezić ka punuar në projekte të ndryshme si producent kreativ, përfshirë filma të shkurtër, seriale televizive dhe filma artistikë të gjatë. Gjatë karrierës 12-vjeçare, ai ka prodhuar 14 filma të shkurtër të animuar. Veprat e tij kanë fituar çmime në festivale të mëdha si Animafest Zagreb, OIAF dhe Annecy. Janë përzgjedhur gjithashtu për festivale prestigjioze si Sundance, TIFF dhe Berlinale, dhe ishin në listën e shkurtër për Çmimet Oscar 2024.

Paneliste: Flaka Kokolli

Flaka Kokolli është animatore dhe regjisore nga Kosova. Në vitin 2019 ajo u diplomua në Universitetin Metropolitan të Budapestit me një diplomë Bachelor në Animacion. Përpara kësaj, angazhimi i saj me animacionin filloi në vitin 2013 kur ajo u bë pjesë e Festivalit Ndërkombëtar të Animacionit Anibar si vullnetare, pastaj si tutore punëtorie, anëtare e panelit të përzgjedhjes së filmave dhe deri në vitin 2024 intervistuese e festivalit. Në vitin 2020, ajo hapi studion e animacionit në Prishtinë 'Flammorum', me të cilën ka përfunduar tre filma të shkurtër, dy video muzikore të animuara dhe shumë projekte të tjera të animuara, të tilla si video shpjeguese dhe përmbajtje edukative për organizata dhe iniciativa të ndryshme.

Panelist: Krste Gospodinovski

Krste Gospodinovski është një regjisor dhe animator maqedonas. Ai studioi pikturë në Akademinë Kombëtare të Arteve - Sofje dhe aktualisht po bën doktoraturën në studime kulturore /animacion.

Ai është profesor dhe drejtues i departamentit të animacionit në Universitetin e Arteve Audiovizuale - Europa Prima - Shkup, dhe një nga themeluesit e Festivalit për filma të shkurtër evropianë të animuar, Flipbook Film Festival në Shkup. Filmat e tij të mëparshëm të shkurtër të animuar (autor/bashkautor) Gottlieb (2018), Snakelet (2020) dhe Not-Being (2023) u shfaqën në mbi 100 festivale dhe fituan disa çmime.