Të papaguara dhe të padukshme

Si pasojë e normave gjinore dhe konstrukteve sociale tradicionale që formohen që nga fëmijëria e hershme, shpesh krijohen pritshmëritë që gratë dhe vajzat të marrin përsipër përkujdesin familjar si punë të papaguar. Kjo shpërndarje e pabarabartë e punës së papaguar, e cila intensifikohet në moshën e rritur të grave, ka efekt të drejtpërdrejtë në zhvillimin e tyre individual dhe profesional. Në këtë panel do të diskutohet se si ndikojnë normat gjinore tradicionale në jetën individuale dhe profesionale të grave dhe vajzave dhe cilat masa mund të ndërmerren për të promovuar një ndarje më të barabartë të punës së papaguar.

Mirushe Syla

Mirishahe Syla është hulumtuese e çështjeve gjinore, aktiviste për drejtësi gjinore dhe është e angazhuar në projekte zhvillimore në Kosovë. Aktualisht angazhohet në një projekt për zhvillim të qëndrueshëm dhe gjithëpërfshirës ekonomik. Me të njëjtin mision, më herët ka qenë e angazhuar në sektorin e bujqësisë. Ajo ka kryer studimet e saj bachelor në Shkenca Politike në Universitetin e Prishtinës dhe ato master në Studimet e Grave dhe Gjinisë në Universitetin e Iowa-s Veriore, SHBA. Gjithashtu, është certifikuar nga ETH - Instituti Federal Zviceran i Teknologjisë Cyrih, në kursin 'Gjini dhe Ekonomi', si dhe së fundi nga Instituti Springfield në programin "Making Market Systems Work".
Gjatë dekadës së fundit, Mirishahja ka trajtuar në mënyrë aktive dhunën me bazë gjinore, të drejtat ekonomike të grave dhe pjesëmarrjen e margjinalizuar politike. Projektet dhe fushatat e saj në Kosovë kanë përfshirë grupe të ndryshme, duke reflektuar përkushtimin e saj për gjithëpërfshirje. Puna e Mirishahes është e rrënjosur thellë në mendimin feminist, duke formësuar rolet e saj si punonjëse zhvillimore, menaxhere projektesh, studiuese, publiciste dhe mentore.

Luljeta Demolli

Luljeta Demolli është sociologe me përvojë të gjerë në menaxhimin e projekteve, veçanërisht në çështjet gjinore në Kosovë. Ajo ka punuar për 20 vjet në Qendrën Kosovare për Studime Gjinore në Prishtinë, Kosovë, si Kërkuese Kryesore, Menaxhere Projekti, dhe tani si Drejtore Ekzekutive. Aktivitetet kryesore të saj përfshijnë avokimin për politika publike lidhur me barazinë gjinore dhe studimet gjinore, transformimin e statusit social të grave me një theks të veçantë në të drejtat e grave, inkurajimin dhe mbështetjen e kulturës dhe dijes së grave përmes hulumtimit, zhvillimin e një kulture dialogu pa dhunë bazuar në gjinë, shqyrtimin e politikave nga një perspektivë feministike kritike, kryerjen e hulumtimeve për publikime, dhe promovimin e programeve të studimeve gjinore në arsimin e lartë. Znj. Demolli ka njohuri të thelluara për rrethanat politike dhe sociale për shkak të përvojës së saj të mëparshme në organet e shtypit dhe medias. Ajo gjithashtu ka përvojë të gjerë me shoqërinë civile dhe komunikimin me aktorë të ndryshëm brenda sektorit.

Hana Bicaj

Hana Bacaj është Drejtoreshë e Departamentit të Kërkimeve në UBO Consulting në Prishtinë. Ajo mban një shkallë Master në Zhvillim Ekonomik dhe një Sertifikatë të Lartë në Studime Gjinore nga Universiteti Vanderbilt në Nashville, Tennessee (SHBA). Ajo është një hulumtuese me përvojë të pasqyruar në sektorin e zhvillimit. Përmes përvojës së saj në organizata ndërkombëtare dhe firma konsulence në Kosovë, Shtetet e Bashkuara, dhe Amerikën Latine, ajo është bërë një agjente e ndryshimeve pozitive në Kosovë, veçanërisht në fushat e arsimit dhe punësimit, që janë dy faktorë themelorë të zhvillimit të komunitetit. Ambiciet e saj karshi karrierës përqendrohen në ndihmën e komuniteteve në nevojë, me një theks të veçantë në arsimin dhe punësimin e grave, të rinjve dhe grupeve të tjera të vulnerueshme.

Dita Dobranja

Dita Dobranja është një ekonomiste e përkushtuar feministike me mbi 13 vjet përvojë të gjerë në dizajnimin e hulumtimeve, analizën e politikave dhe planifikimin strategjik. Ajo ka drejtuar mbi 30 projekte hulumtuese ekonomike që fokusohen në tregjet e punës, fuqizimin ekonomik të grave dhe barazinë gjinore. Si anëtare e Shoqatës Ndërkombëtare të Ekonomisë Feministe, Dita ka kontribuar ndjeshëm në diskursin mbi barazinë gjinore përmes rolit të saj në organizata të ndryshme, përfshirë UNICEF-in, Bankën Botërore dhe Bashkimin Evropian. Ajo gjithashtu është kërkuese kryesore në disa raporte pionierë të cilat ishin të parat në analizimin e mundësive ekonomike dhe pengesave për gra në Kosovë, të cilat mbeten shumë relevante edhe sot.